Izindaba

Umndeni uhambe nezishaqane kuNelson Mandela Marathon

ZIBHALE kabusha umlando izithandani ezidabuka e-Ethiopia uMuhajr Sraj noSofiya Shemsu zinqoba iNelson Mandela Marathon ngeSonto. Lo mjaho uqale eMahayi Hall eMbali, eMgungundlovu yaphelela eNelson Mandela Capture Site, eHowick. UMuhajr uphule irekhodi labesilisa ngesikhathi eqeda umjaho ngesikhathi esingama-2:26:18. Leli rekhodi beliphethwe nguThobani Changwe kusuka ngowezi-2014 ngesikhathi enqoba iNelson Mandela Marathon ngesikhathi esingama-2:27:12.

USofiya ongunkosikazi kaMuhajr ubhale kabusha irekhodi lika-Irvette van Zyl odabuka kuleli ngesikhathi enqoba iNelson Mandela Marathon ngesikhathi esingama-2:45:21. U-Irvette wayenqobe iMandela Marathon ngowezi-2014 ngesikhathi esingama-2:47:15. USofiya ushiye uzakwabo uSelam Abere Alebachew ngemizuzu eyisishiyagalolunye njengoba uSelam eqede endaweni yesibili ngesikhathi esingama-2:54:25. Ngokwesithathu uSalam eqeda endaweni yesithathu kuNelson Mandela Marathon njengoba enza ngowezi-2015 nangowezi-2016. Okunguyena kuphela oqede kuTop 3 odabuka kuleli kulo nyaka uSanelisiwe Mbanjwa oqede endaweni yesithathu ngesikhathi esingama-3:03:37.

Ngokunqoba lo mqhudelwano lezi zithandani zihlomule ngezi-R100 000 ngamunye. Kube sekunezezelwa ngezinkulungwane ezingamashumi amahlanu (R50 000) njengoba bebhale kabusha amarekhodi. Lokhu kusho ukuthi lo mndeni ohlabene ngezinkulungwane ezingamakhulu amathathu (R300 000) ngokunqoba lo mjaho ongama-42km. Lezi zithandani zithe lo mjaho ubungelula neze, bakhale ngobunzima bomzila ebekugijinywa kuwo. UMuhajr uthe, “Umjaho wanamhlanje ubunzima kakhulu, uwufani nowaseDubia naseParis. Lo mjaho angizange ngiwuthole ulula, awulula lo mzila ebesigijima kuwona. Ngingumuntu oqeda iMarathon ngesikhathi esingama-2:20 kodwa namhlanje ngiqede emveni kwama-2:26. Bekufanele ngisebenze kanzima ukuze ngikwazi ukunqoba namhlanje.”

UNkosikazi ohlulekile ukuchaza ngendlela azizwa ngayo emveni kokunqoba umjaho ngenxa yokungakwazi ukukhuluma isiNgisi, into akwazi ukuyisho ukuthi umzila “ubunyukela kakhulu”.

Emjahweni webanga lama-21km oqale eHilton waphelela lapho kwaboshelwa khona uNelson Mandela eHowick unqotshwe uJoel Mmane ngesikhathi esiyi-1:06:07, ophume endaweni yesibili uThabang Masiako ngesikhathi esiyi-1:06:20.
Esigabeni sabesifazane kunqobe uRutendo Nyahora odabuka eZimbabwe ngesikhathi esiyi-1:17:14 ehlula umkhaya wakhe u-Olivia Chitate ophume endaweni yesibili ngesikhathi esiyi-1:17:38.
Esigabeni samabanga angama-10km kwabesilisa kunqobe uPrecious Mashele ngesikhathi esiyimizuzu engama-0:30:31.
USibusiso Nzima ulale isibili ngesikhathi esimizuzu engama-0:30:35. UJenna Challenor unqobe isigaba sabesifazane ngesikhathi semizuzu engama-0:36:44, endaweni yesibili kube nguMathakane Letsie ngesikhathi semizuzu engama-0.36.45.

 

Imiphumela:

42km Abesilisa
    Muhajr Haredin 2.26.18
    Wondwosen Ketema Mamo 2.27.44
    Teboho Noosi 2.27.47

42km Abesifazane
    Sofiya Shemsu 2.45.21
    Selam Abere Alebachew 2.54.25
    Sanelisiwe Mbanjwa 3.03.37

Show More

Ezinye izindaba

Leave a Reply